Tayanch doktorantura (PhD) va doktorantura (DSc)ga qabul: ilmiy tadqiqot ishi taqdimotiga qo’yiladigan talablar, baholash mezonlari va apellyatsiya tartibi to’g’risida
Samarqand davlat universitetining Denov tadbirkorlik va pedagogika instituti O‘zbekiston Respublikasi Prezidentining 2026-yil 26-maydagi “Yangi avlod ilmiy kadrlarini tayyorlash va ularni attestatsiya qilish tizimini takomillashtirish to‘g‘risida”gi PF-98-son Farmoniga muvofiq, ilmiy kadrlar tayyorlashning ustuvor yo‘nalishlariga oid ixtisosliklar bo‘yicha tayanch doktorantura (PhD) va doktorantura (DSc)ga qabul kirish imtihoni o‘rniga ilmiy tadqiqot ishi taqdimoti asosida amalga oshirilishini ma‘lum qiladi.
- Taqdimotga qo‘yiladigan asosiy talablar
— taqdimot davlat tilida tayyorlanadi; institut faoliyat yo’nalishi xususiyatidan kelib chiqib rus yoki ingliz tilida tayyorlanishiga ham yo‘l qo‘yiladi;
— PhD talabgorlari uchun taqdimot: tadqiqot mavzusi va talabgor to‘g‘risidagi ma’lumotlar, mavzuning dolzarbligi va o‘rganilganlik darajasi, tadqiqot maqsadi va vazifalari, obyekti/predmeti/qamrovi, metodologiyasi va usullari, tadqiqot g‘oyasi va ilmiy ahamiyati, amalga oshirish bosqichlari va ish rejasi, amalga oshirish imkoniyati va yakuniy asoslash bo‘limlaridan iborat bo‘ladi;
— DSc talabgorlari uchun taqdimot: yuqoridagilarga qo‘shimcha ravishda avvalgi ilmiy natijalar va ularning bog‘liqligi, ilmiy muammoning zamonaviy holati, tadqiqot konsepsiyasi, kutilayotgan ilmiy yangilik hamda tadqiqotni amalga oshirish strategiyasi bo‘limlarini o‘z ichiga oladi;
— taqdimotda keltiriladigan barcha ma’lumotlar ishonchli ilmiy, statistik yoki tahliliy manbalarga asoslanishi shart;
— taqdimot loyihasi hujjat topshirish jarayonida talabgor tomonidan Yagona elektron tizimga elektron shaklda yuklanadi.
- Baholash mezonlari
— talabgorning taqdimoti 100 ballik tizimda baholanadi;
— baholash ikki bosqichda o’tkaziladi: birinchi bosqichda hujjat topshirish jarayonida taqdim etilgan materiallar bo‘yicha dastlabki baho, ikkinchi bosqichda talabgorning og‘zaki taqdimoti va komissiya savollariga javoblari bo‘yicha yakuniy baho qo‘yiladi;
— har bir komissiya a’zosi talabgorni mustaqil baholaydi, yakuniy natija barcha a’zolar qo‘ygan ballarning o‘rtacha arifmetik qiymati sifatida hisoblanadi;
— baholash to‘liq mezonlar jadvali (ko‘rsatkichlar va ball berish shartlari bilan) ushbu e’longa ilova qilingan tegishli hujjatda keltirilgan.
- Apellyatsiya tartibi
— talabgor baholash natijalari e’lon qilingan kundan boshlab 1 (bir) ish kuni ichida institut qabul komissiyasi nomiga yozma apellyatsiya arizasi bilan murojaat qilishi mumkin;
— apellyatsiya arizasini ko’rib chiqish uchun baholashda ishtirok etmagan a’zolardan iborat alohida apellyatsiya komissiyasi tuziladi;
— ariza kelib tushgan kundan boshlab 3 (uch) ish kuni ichida ko’rib chiqiladi va natija talabgorga yozma ravishda ma’lum qilinadi.
- Muhim muddatlar
— hujjat topshirish jarayonida taqdimot loyihasini Yagona elektron tizimga yuklash — belgilangan qabul muddatlarida;
— yuklangan taqdimot loyihalariga tegishli o‘zgartirish kiritish imkoniyati — 2026-yil 30-oktabrga qadar.
Qo’shimcha ma’lumot va murojaatlar uchun institutning ilmiy ishlar bo‘yicha bo‘limiga murojaat qilishingiz mumkin.
