Denov tadbirkorlik va pedagogika instituti iqtidorli talabalari “Qatag‘on qurbonlari xotirasi” muzeyiga tashrif uyushtirdi
Denov tadbirkorlik va pedagogika instituti Yoshlar ittifoqi BT yetakchilari, kengash a’zolari va iqtidorli talabalar “Qatag‘on qurbonlari xotirasi” muzeyiga tashrif buyurishdi.
Bu tashrifning asosiy maqsadi — yosh avlodda vatan tarixini chuqur anglash, mustaqillik yo‘lida qurbon bo‘lgan ajdodlarimiz xotirasini yod etish, ularning fidoiy tajribalari orqali inson huquqlari, adolat va erkinlik tamoyillarini mavhum emas, balki jonli dalillar orqali his etish orqali tarbiyaviy-ma’naviy ongni mustahkamlashdan iborat edi.
📍 “Qatag‘on qurbonlari xotirasi” muzeyi, u mamlakatimiz tarixida turli davrlarda siyosiy repressiya va qatag‘on qurbonlariga bag‘ishlangan muhim ilmiy-ma’rifiy maskan hisoblanadi. Muzeyning boy ekspozitsiyasi orqali sovet davrida va undan avvalgi tarixiy jarayonlarda insonlar boshidan kechirgan og‘irliklar, qatag‘on siyosatining fojialari chuqur yoritilgan. Muzeyda hujjatlar, fotosuratlar, shaxsiy xotira buyumlari va tarixiy materiallar orqali o‘sha davr voqealari jonli dalillar bilan talabalarga yetkazildi.
Yoshlar ittifoqi BT yetakchisi S.Xidirov tashrif chog‘ida yoshlarni tarixni o‘rganishga ilhomlantirgan holda, bugungi tinchlik va mustaqillik sharoitining qanchalik qimmatli ekanligini, har bir insonning erkinligi uchun kurashgan ajdodlar xotirasini abadiylashtirish zarurligini ta’kidladi. U shuningdek talabalarga tarixiy voqealarni chuqur his eta bilish, faqat rasmiy darsliklardagi ma’lumotlar bilan cheklanmasdan, muzey ekspozitsiyalari bilan tanishish orqali real tarixiy izchil fikrga ega bo‘lishning ahamiyatini qayd etdi.
Talabalar muzey ekspozitsiyalarini aylanib chiqib, qatag‘on davri qurbonlari hayotlari hamda ularning oilalari taqdiri bilan tanishdilar. Bu tashrif, ularning tarixiy xotira va vatanga fidoyilik tuyg‘ularini mustahkamlashga xizmat qildi.
